Ice-pangku kulinytja kutjupankunytja -Mental health effects of ice

Ice munu kutjupa tjutangku yuutjumilanyangka katangka kulinytja munu wuyurpa kulu kuralpai.

Kutjupara kanpa nyanga palunya yuutjumilanyangka kura nyanga paluru tjana utiringkupai munu kutjupara malangka ngarapai.

Anangu kutjupa tjuta kanpa yuutjumilara kulinytja kutjupa ngaraku tjintu mankurpakutu ka kutjupa tjutangka rawa nguwanpa ngaraku tjinguru wiiki mankurpakutu.

Ka kutjupa tjuta kata kura titutjara ngaraku munu miritjina tjikira kutju palya nyinapai kata lipularingkula.

TIce yuutjumilara kulinytja kutjupa nyanganpa tjinguru utiringkuku:

Tjukutjuku ngarala wiyaringkunytja tjuta.

Pikatiringkunytja, kaar-kaararinytja, wuyurpa mapalku kutjuparinytja.

Putu kunkunaripai

Ngunti-ngunti kulinytja

ilura-ilura nyinanytja

Kurunpa munu kulinytja
ngulu-ngulu nyinanytja

Ngunti ipilyarira
pukul-pukularinytja
Rawa mulapa palyalkatinytja tjuta
- Putu ice wantiriyalpai
- Ngulu-ngulu nyinapai
- Putu malakutura kulilpai
- Ngunti-ngunti
  ngukalpai
- Kulinytja pulka nyinapai
- Ngunti-ngunti mula-mula
  palku kulilpai kata kurangku
- Putu rawangku atatjura kulilpai

WHAT ARE SIGNS SOMEONE MAY BE EXPERIENCING A MENTAL HEALTH PROBLEM?

Putu kunkunarinytja nyanga alatji
Kanpa nyanga paluru Methamphetamine-tu uruly-urulypa palyalpai. Ka kutjupa tjuta yuutjumilara wanka-wanka ngaripai putu kunkunarira munu kutjupara ilatu-ilatu kunkuntjanu wankaringkupai. Ka kutjupa tjuta, kanpa puntungka wiyaringkunyangka kuwaripatu putu kunkunaripai

Putu kunkunarinytja tjuta kutjupara kunkuntjanu pakalpai ilatu-ilatu munu putu malaku kunkunaripai. Ka tjinguru rawa alatji ngaranyangka paluru paku pulkaringkula putu tjintungka atatjura kulilku munu kata pikaringkuku kunkunkitja.

Anxiety disorder - Kurunypa ngulu-ngulu nyanga alatji.
Methamphetamines-pangku, ice-tu tjana, kututu wala winki tuutuuntjaku palyalpai ka kutjupa tjuta alatjirinyangka putu ngaalmankupai. Kutjupa tjuta pulkara nguluringkupai munu ngunti ngukalpai. Nyanga purunypa kulu utiringkupai, ngunti-ngunti para-ngaranytja, tjitiringkunytja, kata uparingkunytja, akuri-akuritjararingkunytja, tjaa winpinpi piltiringkunytja, puntu winki aka-aka, kata patjantja, tjuni pikaringkunytja munu ulkapa-ulkapa.

Tjinguru nyanga alatji rawa tjintu kutjupa tjintu kutjupa wiiki tjutanguru ngarantjitjangka doctor-ngku nyakula ngurkantankuku ngaranytja.

Ngangatja puuntara, nintiringkunytjikitjangku yaaltji-yaaltjingku Anangu kurunypa ngulu-ngulutjara alpamilanytjikitjangku.

Depression – kulinytja pulka, iluru-iluru nyinanytja nyanga alatji
Anangu yuutjumilantjatjanu tjiturutjituru pulkaringkupai, munu paku pulka, munu kaarkaarpa. Nyanganpa utiringkula ngarapai hour tjutangka munu kutjupara tjintu tjutangka. Kaya rawa yuutjumilalpai kutjupa tjuta kanpa wiyangka kuwaripatu kurunpa tjaru iluru-iluru ngarapai. Panya kanpa nyanga paluru ngukunypangka pukulmankupainya ma-tjukutjukulpai. Anangu nganmanypa depression-tjara nyinapainya tjinguru kanpa yuutjumilanyangka nyanga katutja tjuta utiringkuku.

Ka Anangu kutjupa pika nyanganpa rawa ngaranyangkampa, tjintu kutjupa tjintu kutjupa, wiiki kutjarangka waintara, tjinguru paluru pika nyanga ini depression-tjara nyinanytja.

Psychotic disorders - (ngunti mula-mula palku kulini) nyanga alatji.
Anangu kutjupa tjutangku rawangku ilatu-ilatu yuutjumilara, kata kuraringkula ngunti-ngunti kulilpai nyanga alatji:
- Ngunti-ngunti alatji ngukara kulilpai ‘Ai Anangu nyarangkuni kukanymananyi’.
- Mula-mula palku pinangku kulini munu nyanganyi munu mayu ngunti pantini (tjinguru, kulini Anangu kutjupangku altinyangka palku Anangu wiya ngaranyangka, munta ngunti kutjupa-kutjupa nyanganyi urinyangka)
- Tjukurpa kutjupa kulini (tjinguru Anangu kutjupangku palumpa katangku kulinytja kutitjunkuntja)
- Ilatu-ilatu palyalkatinyi rawangku (tjinguru kutjupa tjuta ilatu-ilatu kilinananyi munta mara rawangku paltjini)
- Kutjupara alatji kulira mapalku nguwanpa kulinytja palyaringanyi, munu kutjupara rawa alatjirinyi tjintu tjutangka. Ka kutjupa tjara rawangku alatji kulilpai wiiki tjutangka munu kutjupara kanpa yuutjumilara wiyaringkula kuwaripatu kulintja ngunti-ngunti ngaranyi. Ka alatjirinyangka doctor-ngku tjinguru pika kutjupa ngurkantankuku ini

Yaaltjinguru alpa mantjintjaku (support)

Nyuntu alpaku wangkanytjaku ngaranyi nyuntu walytjangku, munta nyuntumpa malpaku, munta nyuntumpa walytjaku. Tjinguru nyuntu putu kulini alpa mantjintjikitjangku palu utin mapalku wangkama rawa patantjawiyangku. Tjinguru nyuntu malpa, munta walytja wirungka warara wangkama. Munu mukuringkula doctor-ngka wangka ka nyuntumpa alpamilanytjaku mantjilku mununku tjukurpa Anangu tjutangka ma-tjakultjunkunytjawiya.

Nyuntu kutjupa-kutjupaku nintiringkuntjikitjangku mukuringkula nyangatja nyawa, nyanga palula ‘When and Where to Get Help’ munu ‘What Type of Help is Available?’

If you need emergency support, call Lifeline on 13 11 14 (a free and confidential 24-hour crisis helpline) or dial ‘000' for the police or an ambulance.

View this page in English